۲۰۰۸ءِ سال بلوچءِ واستا هنچوش که پیسریگین سالان یکے چه سیاهترین سالان ات.اے سال گون بازین اڑءُ جنجالان گوست.
مروچی اے هبر چه کسءَ چیر نه انت که بلوچءِ تاریخ، زبان ءُ دودءُ ربیدگ بلوچءِ وجود ءُ حیثیتءُ آبرو مان وڑ وڑین جاوران دیم په دیم انت.
گوستگین سالا سدانی هسابءِ بلوچ مان ایرانی اسلامی رژیمے هونوارین و نا انساپ پسندین هکومتے واکانی دستا شهید و بازین مات و پتے چه وتی چوک و هنچوش بازین چوکے چه وتی پت ءُ مات سوگیءُ زبهر کنگ بوتک انت.
مان بلوچستانءِراجی تاریخءَ تان جاهے که من پٹ ءُ پول کتگ هچ چشین زلم ءُ زورکشت ءُکوش پروشت ءُ پروش نیاتکگ که هنوگین ایرانے رسترینِ هکومتءَ مئےبزگین راجءِ سرءَ آرگاانت .
اپسوز هزار ارمان که انگت هزارانی هزارے هسابءَ مان سیاه تهارین بندیگ جاهان بندیگ انت و گون پاهوءَ دیم په دیم انت.
بلوچستانءِهر کنڈیءَ آس جمبور انت.چه بلوچستانءِ نوکین نسل ءُ اوبادگءَ گپتگ تان ملاءُ ءُ غیر وانندگ هر روچ لٹُ ءُ کٹ ، په زور منینگ ءُ پدا مان وتی بیمناکین بندیگ جاهان بندیگ ءُ پاهو دئیگ بنت.
کومئے پجار سه چیز انت ، زبان، دودءُ ربیدگءُ هنچوش سرزمین،بلوچ راج چه اے هر سئین چیزان زبهر انت، بزان راجیءُ کومی نابرابری، دودءُ ربیدگی نابرابریءُ هنچوش اجتماعیءُ گزرانی نابرابری.
بلوچستانے حق ءُ حقوقءِ باروءَ بلوچستانءِ راجی جنز ءُ مسئلے باروءَ مان بلوچی تنظیمان ءِ ویب تاکان ءُ مهپلان بازین گپ ءُ تران بوئگا انت. بلئےبلوچان راست گوشتگ که په هلوا هلوا کنگ دپ شیرکن نبیت.
اگن واکی لوٹیت که گون هلوءَ دپءَ شیرکن بکنت گڑا پدگیری المی انت. مارءَ لازمی انت که گرءُ لانچ ءُ تچءُ تاچ بکنین. هما چیزانی پدا بجینن که هلوا چه آهان اڈ کنگ یا که جوڑ کنگ بیت.
آ چیز منی هیالا هورکاری انت تپاکی انت.هوری ءُ مچی انت. یک و دگرے برداشت کنگ انت.هور کاریءِ هیل کنگ انت.آ کومے وژهالی انت.آگن منی ءُ تئی دل سپا انت په راجی حقانءِ جد ءُ جهد کنگءِ واستءَ گڑءَ پر چے په اتحادءُ هورکاریءَ چم جنین؟.
روشین هیالین براتان واجهان ءُهاتونین گوهاران!
بلوچ راجے نزوری و کم کاریءِ سبب باز انت. من دو نمونگ شمے هزمت ءَ پیش کنان:
یکے بلوچے وتی جندے توکی دژمن انت . دومی بلوچ راج و بلوچستانے ڈنی دژمن انت. اے هن چنت بهر انت.آ که ڈنی دژمن انت زانگ بنت که کے انت.
بلےاے گپ کسیے زانتا نیت که راجے توکی دژمن کی انت. آ وتا بلوچ کومے دوزواه زانت، آ هر وهدا همےجهد ءُ کوشستءَ انت که بلوچ کومے سرمچار ءُ هَئِیر لوٹوک زاهر ببنت.
اے هردوئین، بلوچ راجے اتحاد ءُ متحد بیئگے توارءَ کوکارا گون ایرانے رسترین سپاهیگانء وزارت اطلاعات (انتلجنت سرویسے) همکاریءَ نیست ءُ نابود کننت .
اے خبیسین ءُ رسترین حکومتان هنچین دمے یا که تلزمے یاد انت که چیتک و کوکارکنگءَهن نیلیت.چیتک جنوکے دپا هنچوش بند کنت که دگه برے آ هچبر نژگے جت مکنت جی هو رسترانی تلزم کلاشینکوف انت، پاهو انت، بندیگ جاه انتءُ هنچوش اعتیاد انت .
کومئے پجار سه چیز انت ، زبان، دودءُ ربیدگءُ هنچوش سرزمین،بلوچ راج چه اے هر سئین چیزان زبهر انت، راجیءُ کومی نابرابری، دودءُ ربیدگی نابرابریءُ هنچوش اجتماعیءُ گزرانی نابرابری.
ایرانے گوستگین ءُ هنوگین واکدارانی مدیمی کوشست همے بوتگ که آ بلوچ راجءَ گار و آییءِ ملک ءَنیست و نابود بکنت. کومی شعورءُ زانت ءُ راجی دودوربیدگءُ بلوچی زبانءِ نشان ءَ گار بکنت تان همے گپ ءَ بیهال بکنت که آ وت یک راجی انت ءُ یک وهد ءُ زمانگے آ وت یک ملکے ءِ واهند بوتگ.
نون اے چنت سوال انت ءُ إشانءِ حل کنگے جد و جهد و کوشستا په دل و ستک ءَ من چه بلوچ راجءِ راجی تنظیم ءُ پارٹیان ءُ بلوچ دانشورءُ زانتکاران لوٹان.
* کجام بلوچ تنظیم انت یا که بلوچ انت که آ بلوچستانے بے وسی ء هالا سرپد نه انت؟
* کجام بلوچ تنظیم انت یا که بلوچ انت که آ بلوچ راجءِ اڑ و جنجالانے هالا سهیگ ءُسرپد نه انت؟
* کجام بلوچ تنظیم انت یا که بلوچ انت که آبلوچستانءِ حق وحقوقءِ پد مال بوئگے هالا سرپد نه انت
* اے کئے انت که بلوچ راجے حق ءُ حقوقءَپدمال کنگا انت
*اے پهکین نابرابریانے گارکنگے راه چیئنت چون بکنین که اے زورانسریانی دیم دارگ ببیت.
منی هیالا اے ۳۰ سالانی جد و جهدءِ مزنین تجربگ په ما بلوچ راجءِ سیاسی و دودءُ ربیدگی تنظیم و پارٹیان بس انت، سیاست گون کنت،ُ زدءُ کینگ نبیت.سیاست گون منطق،هورکاریءُ اتحادءَ بیت. هنوگین ماهولءَ بلوچانءِ هورکاری، اتحادءُ هوری چه هر چیزءَ دگه واجبتر انت مهمتر انت ۔
بلوچان گوشتگ که گون یک دستی چاپ جنگ نبیت.واجهان منی واستءَ پرک نکنت که گُربگ اسپیتےِ ببیت یان که سیاهے سرپ موشکءَ گپت بکنت.آ امپریالیست ببیت یا سوسیالیست ببیت. آ ملکے که بلوچ راجءَ په حیثیت یک کومئے به منیت ما چه آئی ءَ حمایت بکنین ءُ چه آ مدت بلوٹین.
چه بلوچستان ءِدانشورءُ راجی تنظیمان دزبندی کنان که متحد نبیئگے بیماریءَ چه وتی مجگءَ دربکن ات، ءُ بزان ات که کار په هبر کنگا شر نه بنت عمل هن لوٹیت.کے انت که عمل کنت؟ من ءُ تو که بلوچستانءِ پهکین بارءَ مان وتی کُپگءَکُتگ.
پدا یک پدے دگه چه شما که راجی مسئله ءُ جنزے سرا تپاک ات و زاتی مفادانی سرءَ راجی مفادانءَ گیشتر ترجیح دئیت،دور چه هر وڑین تنگ نظریءَ اے کسانین اڑ و جنجالانءَ بپیچ ات و یک کرءَ إیر کن ات ءُ ایرانے اسلامی جمهوری رجیمےناانساپین،هون وارین ءُ رسترین هکومتی هلاپءَ هوریءَ وتی جد و جهدے کاروانءَ مهکمتر بکن ات .
اے مدتانی مدت انت که تئی ماتءُ منی مات.تئی پِت ءُ منی پِت . تئی گوهار ءُ منی گوهار. تئی چُک ءُ منی چُک سوگی انت، بی واب ءُ بی آرام انتءُ زلمانی تها گارانت.نون منی ءُ تئی باریگ انت که اے زالمانءِ وابءَ چه اهانی چمان به پرین ات۔
بیاات یک جاه هورکاری،تپاکی ءُ هوری ءِ بئیرک ءَ گون دوئین دستان چست بکن ات. راجانی تاریخ اشیرا پیش داشتگ ءُ ثابت کتگ که تپاکی،هورکاریءُهوری آجوئیءِ مستاگ انت. بلوچستانۓ راجی مسئله ءِ راه حل ءُ بلوچانۓ حقءُحقوق ءِ گرگے مادن ءُ کِشک، تپاکــــــــــی ءُهورکاری انت. امیت انت که گون تپاکی ءُ هوری ءَ دیمی سالءَ مان بلوچستانءَ جشن بگرین.
نبشتانکءَ گون ملا فاضلءِ اے گالا هلاس کنان که گُشیت:
ده برات ِات واجه گر سُستی کنت رَد اِنت ناتپاکیءِ وَنده ءَ چے کَٹ ءُ نپ اِنت
بلوچستان سبزبات
بلوچءِ گوانک
هیچ نظری موجود نیست:
ارسال یک نظر